يارا شهوان

مين قال ان الست ضعيفه ومكسورة الجناح!!!! مين قال انها لو ماتحطتش في موقف تقف وتبقى ب ١٠٠ راجل الست هي اللي بايديها تغير نظرة المجتمع ليها سواء عايزاه يشوفها ضعيفه او قويه ، عبدة له أو ملكة يتهز لها جبال ، و عندنا نماذج كثير في تاريخنا المصري و الفرعوني لستات حكمت مصر باكملها مش بس الرجاله انما احنا ايه اللي وصلنا لمرحله زي دي دلوقتي !!! اصبحنا في مجتمع ذكوري من بره و من جوه يعلم الله ده مش تقليل من دور الراجل في المجتمع لكن ده تعظيم لدور الست فيه ،الست في مجتمعنا أصبحت أم اربعه واربعين ايد ورجل ، بتنحت في الصخر و تشتغل اكثر من شغلانه وتطبخ وتنظف وتربي العيال ، كل ده و تبقى ست ضعيفه ازاي !!!!! الست بقت شايله جوزها بهمه و بمشاكله بطفولته باهانته ليها باي شكل من الأشكال عشان عايزه تعيش وتمشي المركب ، و ساعات تتولى امر الصرف عليه و على مزاجه بحكم عدم مقدرته على الشغل او دلع مرىء لمؤاخذه ، تبقى ست ضعيفه ازاي !!!! دور الاعلام ودوري كاعلاميه يحتم علينا كلنا توعيه المرأه بدورها واهميتها وكيانها في المجتمع حتى لو كان مجتمع ذكوري دور الاعلام من خلال المقالات والكتابات و الفيديوهات القصيره نرتقي بوعي المرأه ولازم تعرف ان العيب فينا احنا الستات مش المجتمع ولا الراجل ،الراجل مسكين وأضعف مما نتخيل ، و كل جبروته ماهو الا رعب و خوف و هو في الاخر طفل كبير من السهل الضحك عليه الام باديها تغير المجتمع كله من خلال تربيتها لولادها ، البنت زي الولد ، مش عشان ربنا كرمها بولد تداري و تدلع و تحمي و تشيل عنه مسؤلياته و ترميها على البنت ومش عشان ربنا كرمك ببنت ، تحبسيها و تعلميها الطبخ والكنس والمسح وتبقى شبشب في رجل اي راجل في العيله من اول ابوها لحد جوزها علمي بنتك ازاي تدافع عن نفسها في زمن كله تحرش ومش ازاي تقعد تستنى ظل الراجل اللي هيدافع عنها ، علمي ابنك ازاي يشيل طبقه اللي بياكل فيه ، يشيل نفسه ، يشيل مسؤلياته و يحترم وجود الست في حياته ، علمي بنتك تقول “لا انا مش عايزه” مش ” حاضر انا مجبره اني أوافق ” علمي ولادك الحريه ان الراجل و الست مش بيكملوا بعض لكن بيساعدوا بعض ، مفيش واحد فيهم محتاج للتاني عشان يعرف يعيش ، لكن الاتنين محتاجين بعض عشان المجتمع يتعدل ويبقى موزون في كفتين الميزان اكسري نظرة المجتمع ، غيريها ، شكليها انتي الوحيده اللي بايدك تهدي نظرة المجتمع وتبنيها من جديد .