مروة الشرقاوي

في كل مكان بنروحه بنقابل ناس وشوشها ، ابتسامتها ،بتدينا أمل ،وطاقة سعادة بنحاول ننقلها لبعض عشان نقدر نكمل مشوار الحياة المليان بحاجات كتير صعبة بنحاول نتخطاها ونتجاوزها عشان نوصل لحلم بنعافر طول حياتنا عشانه

“إننا نشعر بالسعادة لأننا لا نتفرج على أنفسنا و نحن سعداء و لا نحلل طبائعنا في أثناء لحظة السرور؛و إنما نعيش اللحظة و نندمج فيها”

 (مصطفى محمود–الأحلام)

أكتشفت بعد عشر سنين شغل فى مجال الأفلام التسجيلية ان عندى ماتريال كتيره جدا لناس بتعدي وهي مبتسمه قدام الكاميرا او ناس طلبت منى أصورهم وهما مبتسمين ، بعد شويه وقت الموضوع ابتدى يتحول ان احيانا اكون انا في حالة نفسية سيئة وأشوف قدامى حد مبتسم أو أحس إنه سعيد فيدينى أمل إن السعادة شيء ممكن وطاقه الفرحة والبهجة إللي جواه دي تتنقلي

“حتى انها من فرط سعادتها كان يخيل اليها انها ارتفعت عن الوجود,وانها لاتستنشق هواء الأرض بل أن ان شهيقها قد بات عبير مجد الدنيا” 
(عبد الحميد جودة السحار– خديجة بنت خويلد)

كنت ممتنة جدا ًلكل شخص وجوده فى اللحظة دي من حياتي خلاني سعيدة لسعادته ،فكرت وقتها انى أعمل فيديو قصير يجمع كل الحاجات كشكروتقدير لكل الناس دي لكن مكنتش فاهمة أوى ممكن اعمل ده ضمن أى سياق ، لحد ما كنت باتمشى يوم على شط البحر جنب بيتنا لقيت مركبة حلوة مكتوب عليها “رحلة سعيدة”، لمعت الفكرة فى عقلي جداً فقلت ليه لا؟ ما جمعش كل طاقة البهجة المكثفة دي لربما تكون سبب فى لحظة ابتسامة حقيقية لاى حد من عباد الله في الدنيا الواسعة دي .

“الحياة السعيدة تحتاج لأقل القليل، فهي بداخلك وتكمن في طريقة تفكيرك” 
(ماركوس أوريليوس)

كلنا في نفس الرحلة ،نفس الطريق ، كلنا بنحاول نخللي رحلة حياتنا،،رحلة سعيدة وعلى رأي الأستاذ نور الشريف في فيلم أبناء الصمت :مش مهم نعيش قد إيه ..المهم إننا نخلق من العمر ده حياة حلوة على قد ما نقدر

دمتم سعداء

مروة الشرقاوى*

زميلة شبكة نساء من أجل الإعلام

فيلم قصير : رحلة سعيدة