هند مدحت

الوقت بيعدي .. أنا الآن على مشارف السنة الثالثة في كلية الإعلام .. أقدر أقول إن الثلاث سنوات الماضية كانوا أهم ثلاث سنوات في حياتي، هما دول اللي بقى عندي فيهم حياة، خلليني أبدأ من الأول ، أنا البنت الوسطى لأسرة مصرية أصيلة ((كانت)) شايفة إن الكليات هما طب و هندسة و ما يليهم تجارة و آداب و ماكانش مقبول أبداً فكرة كلية الإعلام بالنسبة لهم

لما قررت أدخل إعلام لقيت موجة من الاستخفاف من كل اللي حواليا ،اللي يقولك هتشتغلي إيه ؟ و اللي يقولك إنتي محجبة هتعملي إيه في إعلام .. بس الحقيقة إني كنت بسمع كلامهم و اضحك لما أتخيل شكلهم بعد كام سنة لما انجح في مجالي اللي اخترته ..قبل الجامعة أنا ماكنتش شاطرة دراسياً ..في ثانوية عامة فشلت فشل ذريع ..بس كان في حاجه جوايا بتقوللي إنتي مش فاشلة ..كنت دايماً شايفة إنك لما تفشل في نظام فاشل ده مش فشل ..دخلت كلية الإعلام و أنا مقتنعة إن الفشل بعد كده ده قرار و أنا قررت أكون ناجحة قررت أخللي كل الناس اللي ضحكت عليا و اتريقوا عليا و راهنوا على فشلي عشان أنا بنت و محجبة داخلة إعلام..أخلليهم يتفرجوا عليا و يتعلموا مني إزاي يحققوا حلمهم .. نجحت نجاح باهر في كليتي .. بتقديرات ..نزلت اتدربت سينما و تليفزيون ..و دلوقتي بتدرب على إعداد البرامج .. أنا دلوقتي عندي مهارات في ناس متخرجة معندهاش نفس المهارات دي..أنا دلوقتي في ناس أكبر مني سناً ببيجوا يسألوني عملتي كده إزاي .. أنا النهارده كل عيلتي و كل الناس اللي راهنوا على فشلي فخورين بيا ..أنا وصلت لهدف كنت حاطة إني هوصلله بعد عشر سنين وصلت له في ثلاث سنين بس عشان أنا قررت أكون ناجحة ..النجاح قرار .. لو خدتي القرار ..هتنجحي و هيبقى كلام الناس المحبطة دافع ليكي عشان توصلي للنجاح أسرع .. نفسي كل البنات اللي في سني و اللي أصغر يتجاهلوا  تماماً أي حاجة بتتفه من حلمهم .. لازم تعرفي إن حلمك هيبقى تافه للي حواليكي فعلاً لما يلاقوكي بتتخلي عنه عشان ظروف أو كلام .. و هيحترموا حلمك و يقفوا يتعلموا منك لما يشوفوكي متجاهلة أي و كل حاجة و مش شايفة غير حلمك .. إنتي اللي بتتحكمي في نظرة اللي حواليكي ليكي .. أوعي تشتكي من قهر لأن الست القوية لا تقهر .

هند مدحت*

طالبة في الفرقة الثالثة بكلية الإعلام، قسم إذاعة وتليفزيون،الجامعة الحديثة للعلوم والتكنولوجيا