تسنيم عادل

مشكلة أى شخص بيشتغل فى مجال يندرج تحت بند الابداع هو انه للأسف مش بيعرف يشتغل أى شغل غيره
يعنى اللى بيشتغل بالفن باختلاف فروعه بيبقى صعب عليه يخرج بره بحر الفن
وللاسف ده اللى بيحصل برضه فى مجال الاعلام
اللى بيدمن مجال الاعلام بيموت بره بحره 
لما بندخل المجال الاعلامى باختلاف فروعه وخاصة لو كنا شغوفين بيه مش مجرد بنتعامل معاه كعمل لكسب المال بنمتزج امتزاج تام بالمهمة اللى بنؤديها بننغمس فى اعماقها
بس اللى بيحصل فى المقابل اننا بنسقط من امكانياتنا أى مهارات تخص اى مجالات أخرى و ده سئ جدا و مضر على مستويين:
اول مستوى فيما يخص المجال الاعلامى مجال العمل نفسه … الشخص مع مرور الوقت بيتعرض للاحتراق الوظيفى او بمعنى اسهل بيفتقر للابداع و بيفتقر للعطاء فى مجاله
و تانى مستوى يخص العمل خارج نطاق التخصص… العامل بمجال الاعلام من اكتر الاشخاص المعرضين للبطالة فى حالة كونه فقد عمله الاعلامى
ولذلك مش عيب ابدا ان اللى بيمتهن مهنة الاعلام يكون عنده بدايل وظيفية يكون عنده مشروعه الخاص مثلا
ينمى مهاراته اللى تمكنه من ايجاد عمل آخر فى حالة فقده لوظيفته بمهنة الاعلام و عدم تمكنه من وجود البديل
مأقدرش انكر انه شئ صعب و فعلا المبدع مبيعرفش يكون غير مبدع واللى اعتاد على شغف الفن أى كان مجاله صعب يعتاد الملل والروتين
ولكن الاحتياط واجب
تنمية المهارات و السعى لتعلم كيفية امتلاك ادوات جديدة تمكنا من العمل فى مجالات اخرى او تمكنا من ابتكار خدمات جديدة اكثر نفعا لمجالنا الاعلامى اصبح شئ ضرورى و قد يكون واجب وفرض
زمننا النهارده بيبحث عن صاحب الفكرة الجديدة زماننا النهارده عايز اللى بيخلق مساحة لنفسه و لذلك اسعوا بكل ما أوتيتم من قوة لاثبات ذواتكم اخلقوا مساحتكم احرصوا انكم متحرقوش نفسكم( احموا نفسكم من الاحتراق الوظيفى واللى هافرد له  مساحة خاصة بالمقال القادم لعله يساعدكم على عدم الوقوع فى فخه ) مبقولش ابدا انسوا حلمكم او اتخلوا عنه ولكن فتحوا عينكم على البدايل و ابدعوا
واتحلوا بالمرونة ممكن جدا تشتغلوا حاجة مش على مزاجكم النهارده بس تكون نقطة البداية للوصول لشغفكم
ممكن جدا كمان شغفكم فى وقت من الاوقات يقفل الباب فى وشكم يبقى لازم كمان يكون عندكم قدر من المرونة و المهارة اللى تخليكم تنزلوا سوق العمل و خوض التجربة فى اى مجال آخر حتى تتاح لكم الفرصة للعودة لشغفكم مرة جديدة .

تسنيم عادل*

زميلة شبكة نساء من أجل الإعلام